10-05-2024, వీరశైవ మత స్థాపకుడు, గొప్ప సంఘ సంస్కర్త శ్రీ బసవేశ్వరుని 890వ జయంతి

 10-05-2024, వీరశైవ మత స్థాపకుడు, గొప్ప సంఘ సంస్కర్త శ్రీ బసవేశ్వరుని 890వ జయంతి.*

*కుక్కపాలు పంచామృతానికి ఉపయోగపడనట్లే, పాపాత్ముని డబ్బు మంచిపనులకు పనికిరాదు.*

*పరులను ద్వేషించక,  పరుల వస్తువులను అపహరించక, పరుల మనసును బాధించక, అబద్దాలు ఆడకుండా, ప్రశంసలకు దూరంగా ఉన్నపుడే అంతరంగం పరిశుద్ధమవుతుంది.*

*పరమాత్మ మనలను అనుగ్రహించడానికి ఇది చక్కని రాజమార్గం.*

*దేవలోకం, మర్త్యలోకం వేరుగా లేవు. సత్యం పలకడమే దేవలోకం. అసత్యం పలకడమే మర్త్యలోకం.*

*మనం పలికే ప్రతీ మాటలో పరమాత్మ నామామృతం నిండి ఉండాలి.*

*లక్కతో చేసిన విగ్రహం కరిగిపొతుంది.  కట్టెతో చేసిన బొమ్మ విరిగిపోతుంది.*

*ఆలయము కట్టించలేదని బాధపడనవసరం లేదు.*

*హృదయమే గర్భగుడి.*

*శిరస్సే బంగారు కలశం.*

*పరమాత్మ మన హృదయాకాశంలో అంతర్యామిగా ఉన్నాడని తెలుసుకొవడమే భక్తి.*

*ఇలాంటి బోధనలతో పన్నెండవ శతాబ్దికి చెందిన బసవేశ్వరుడు, వీరశైవ మత స్థాపకుడిగా పేరుగాంచాడు.*

*బసవామృతం - నీటిలో నిప్పులాగా, పండ్లలో రసంలాగా, పూలలో పరిమళంలాగా పరమాత్మ సృష్టి అంతా వ్యాపించి ఉన్నాడని భక్తులు విశ్వసిస్తారు.* 

*అతడునిర్గుణుడు, నిరాకారుడు,చావు పుట్టుకలు లేనివాడనీ గట్టిగా నమ్ముతారు.*

*అంకుశం చిన్నదైనా అది ఏనుగు కంటే బలమైనది.* 

*వజ్రం చిన్నదైనా అది పర్వతం కంటే శక్తివంతమైనది.*

*ఆలాగే పరమాత్మను ధ్యానించే మనసు చిన్నదైనా అది మహత్తరమైంది.* 

*మాయ మనిషిని ఆవరించి ఉంటుంది.అది జన్మకు తల్లి. మోహానికి బిడ్డ. మనిషిని అన్నివిధాలా ఆడించేది మాయే. మాయను గెలవడం ఎంతో కష్టం.*

*ఒక్క పరమాత్మకు మాత్రమే మాయను పోగొట్టుట సాధ్యమవుతుంది.* 

*చెప్పేది ఒకటి, చేసేదీ ఒకటి అయితే మనిషిలో పవిత్రత లేనట్లే.*

*చెప్పిన మాటకు కట్టుబడి పనులాచరించే వారినే పరమాత్మమెచ్చుకొంటాడు.*

*ఈలోకం పరమాత్మ సృష్టించి ఇచ్చిన ఒక కర్మాగారం. మనమంతా కార్మికులం.*

*మంచిపనులు చేసినప్పుడే సృష్టికర్త మెప్పు పొందగలం.*

*మనం కొన్ని సందర్భాలలో పాముకు పాలు పోస్తాము. కానీ అవి నిజంగా కనిపిస్తే చంపుతాము.*

*పాపమంటే ఇదే.*

*లింగానికి నైవేద్యము పెట్టడము కంటే, మన ఇంటిముందు నిలబడ్డ జంగమయ్యకు అన్నం పెట్టాలి.* 

*పుణ్యం అంటే అదే.*