*సాయిబాబా లీలలు చేష్టలు అందరికీ ఒక పట్టాన అర్ధంకావు.*
*దాసగణు మహరాజ్ బాబా భక్తుడు. చేసేది పోలీస్ ఉద్యోగం. బాబా ఆదేశముతో తన పోలీసు ఉద్యోగానికి రాజీనామా చేశాడు.*
*అతనికున్న చదువు అంతంత మాత్రమే.*
*ఆర్థిక స్తోమత అసలేలేదు.* *డబ్బు సంపాదించుకొందామన్న కొరిక అసలే లేదు.*
*ఇవన్నీ చాలనట్లు ఒక అనాథ బాలుడిని చేరదీసాడు.* *కొన్నాళ్లకు ఆ బాలుడు యువకుడయ్యాడు.* *చక్కని గాత్రం, చక్కని దస్తూరి, అద్భుత జ్ఞాపకశక్తి, మచ్చలేని నడవడిక ఇవన్నీ ఆ యువకుడి సంపద.*
*అతని పేరు వామన్ అథవాలే .అందరూ ఆతనిని దామూ అన్నా అని పిలిచేవారు.* *ఒకసారి దాసగణు, దాము అన్నాతో సాయిబాబా దర్శనం చేసుకున్నారు.*
*అదేసమయానికి నానా చాందోర్కర్ ,కాకాసాబ్ ధీక్షిత్, కాకా మహాజని మున్నగు భక్తులు ద్వారకామాయిలో ఉన్నారు.*
*వారితో పాటు ప్రముఖ వైద్యుడైన డాక్టరు మహ బల్ మొదలైనవారు కూడా ఉన్నారు.*
*దాము అన్నా తన మధుర గాత్రంతో తుకారామ్ మహరాజ్ అభంగమైన "ఘర్ జానేదో శ్యామ్ మురారి " అన్న పాటను పాడాడు*
*అక్కడవారందరూ ఆ పాటకు తన్మయత్వం చెంది ఆనంద భాష్పాలు రాల్చారు.*
*సాయిబాబా కూడా ఆ పాటకు అనందించి, నాలుగుసార్లు ఆ పాటను పాడించుకొన్నారు. బాబా ఒక పాటను అన్నిసార్లు పాడించుకొన్నట్లు ఇంకెక్కడా గ్రంధస్తమవలేదు.*
*మరొక విశేషమేమనగా ఈ దామోదర అన్నాయే,* *దాసగణు మహరాజ్ రచించిన "సాయినాథ స్తవన మంజరిని " గ్రంధస్తం చేశాడు.*
*ఆ సంగీతాన్ని డాక్టరు మహా బల్, ఆయన భార్య, కుమార్తె కుడా విన్నారు.*
*అప్పుడు సాయిబాబా డాక్టరు మహా బల్ ను చూపిస్తూ దాసగణుతో "గనూ ! నీ కుమారుడైన దాము అన్నాకు, డాక్టరు మహా బల్ కూతురినిచ్చి వివాహం చేయవచ్చుగా " అని అన్నారు. అక్కడేఉన్న డాక్టరు, ఆయన భార్యా, కూతురు ఆ మాటలు విన్నారు కానీ మౌనంగా ఉండిపోయారు. అంతట వారు బాబా అనుమతిపొంది వారి స్వస్థలమునకు వెళ్ళిపోయారు.*
*డాక్టరు మహా బల్ కు, షిరిడీలో తన కుమార్తె వివాహము గూర్చి బాబా పలికిన పలుకులు చెవిలో ప్రతిధ్వనిస్తున్నాయి. ఏమి చేయాలో అర్ధంకావటం లేదు.*
*ఒక అనాథ యువకునికి తన కుమార్తెను ఇచ్చి వివాహం చేయడమా ? సాయిబాబా మాటను తిరస్కరించడమా ?*
*చివరకు సాయి మాటే తనకు వేదవాక్కుగా భావించాడు.*
*బాబా అదేశం ముందు సామాజిక ఆర్థిక అసమానతలు ఎవరు చూస్తారు ?*
*డాక్టర్ కుమార్తెతో మాజీ కానిస్టేబుల్ దాసగణు పెంపుడు కుమారుడైన వామన్ అథవాలే ( దాము అన్నా ) తో వివాహం జరిగింది.*
*ఇదే సాయిబాబా లీల అంటే !*
No comments:
Post a Comment